സിപിഎമ്മിലെ മാറ്റം: ആര്‍എംപിക്കും മനംമാറ്റം?

വിശാഖപട്ടണത്ത് നടന്ന സി.പി.എം. 21ാം കോണ്‍ഗ്രസ് അംഗീകരിച്ച പരിഷ്‌കരിച്ച അടവുനയം ഇടതുപക്ഷ രാഷ്ട്രീയത്തില്‍ പുതിയ ഉണര്‍വും ആവേശവും സൃഷ്ടിക്കുമെന്ന് ആര്‍.എം.പി.സംസ്ഥാന സെക്രട്ടേറിയറ്റംഗവും ഇടതുപക്ഷ ഏകോപനസമിതിയുടെ മുന്‍ പ്രസിഡന്റുമായ ഡോ.ആസാദ്.

നാലാം ലോകത്തിനും സി.പി.എമ്മിലെ 'വലതുപക്ഷവത്കരണ'ത്തിനുമെതിരെ 'വിമത' പ്രവര്‍ത്തനത്തിന് തുടക്കംകുറിച്ച് അധിനിവേശ പ്രതിരോധസമിതി രൂപവത്കരിക്കുകയും ആദ്യ സെക്രട്ടറിയായി പ്രവര്‍ത്തിക്കുകയും ചെയ്ത ഡോ.ആസാദ് തന്റെ ബ്ലോഗില്‍ എഴുതിയ ലേഖനത്തിലാണ് സി.പി.എം.നേതൃത്വത്തില്‍ വിശാലമായ ഇടതുപക്ഷ ഐക്യം കെട്ടിപ്പടുക്കുന്നതിന് അടവുനയത്തിലെ മാറ്റം വഴി തുറക്കുന്നതായി അഭിപ്രായപ്പെടുന്നത്

രാഷ്ട്രീയത്തില്‍ നയപരമായി താത്കാലികമായി ഉണ്ടാകുന്ന എതിര്‍പ്പുകള്‍ സ്ഥായിയല്ല. ഏതു ഭാഗത്തും കുടിപ്പകകള്‍ക്ക് സ്ഥാനമില്ലെന്നും രാജ്യത്തിന്റെ പുതിയ രാഷ്ട്രീയ സാഹചര്യം വിശാലമായ ഇടത് ഐക്യം അനിവാര്യമാക്കുന്നുണ്ടെന്നും ഡോ.ആസാദ് മാതൃഭൂമിയോട് പറഞ്ഞു.