ഭീകരരെ നേരിടാന്‍ പാക് സൈനികത്തലവന്‍ കാബൂളില്‍
Posted on: 18 Dec 2014
ഇസ്ലാമാബാദ്: താലിബാന്‍ ആക്രമണത്തിന്റെ പശ്ചാത്തലത്തില്‍ പാകിസ്താന്‍ സൈനികത്തലവന്‍ ജനറല്‍ റഹീല്‍ ഷരീഫ് അഫ്ഗാനിസ്താന്‍ സന്ദര്‍ശിച്ചു. ഇരു രാജ്യങ്ങളുമായുള്ള രഹസ്യാന്വേഷണ സഹകരണം മെച്ചപ്പെടുത്തുന്നതു സംബന്ധിച്ച് അഫ്ഗാനിസ്താന്‍ പ്രസിഡന്റ് അഷ്‌റഫ് ഘനിയുമായി ചര്‍ച്ച നടത്താനായിരുന്നു ഇത്.
പാക് രഹസ്യാന്വേഷണ ഏജന്‍സി ഐ.എസ്.ഐ.യുടെ തലവനും ജനറല്‍ റഹീലിനൊപ്പമുണ്ടായിരുന്നു. പെഷവാറിലെ സൈനിക സ്‌കൂള്‍ ആക്രമിച്ച ഭീകരര്‍ക്ക് അഫ്ഗാനിസ്താനുമായി ബന്ധമുണ്ടെന്ന സംശയം ബലപ്പെട്ട സാഹചര്യത്തിലാണ് കൂടിക്കാഴ്ച. ഭീകരരില്‍ ചിലര്‍ അറബിയാണ് സംസാരിച്ചിരുന്നതെന്ന് വ്യക്തമായിട്ടുണ്ട്. വടക്കുകിഴക്കന്‍ അഫ്ഗാനിസ്താനില്‍ ഒളിവിലുള്ള പാക് താലിബാന്‍ തലവന്‍ മുല്ല ഫസ്ലുള്ളയെ കൈമാറ്റം ചെയ്യണമെന്ന് പാകിസ്താന്‍ ഈ ചര്‍ച്ചകളില്‍ ആവശ്യപ്പെട്ടേക്കുമെന്ന് സൂചനയുണ്ട്.
അഫ്ഗാന്‍ താലിബാന്‍ ഭീകരര്‍ക്ക് പാകിസ്താന്‍ തണലേകുന്നതായി അഫ്ഗാനിസ്താനും പാക് താലിബാന്‍ ഭീകരര്‍ക്ക് അഫ്ഗാനിസ്താന്‍ സംരക്ഷണമൊരുക്കുന്നതായി പാകിസ്താനും പരസ്പരം പഴിചാരുന്നത് പതിവാണ്. ഇക്കാര്യങ്ങളും ചര്‍ച്ചകളില്‍ വന്നേക്കും.
ga