കൊല്ലം: സിനിമാ സ്റ്റൈലില് ഓണമാഘോഷിക്കാന് ലക്ഷങ്ങള് ചെലവിടുന്ന യുവാക്കള്ക്ക് മാതൃകയാവുകയാണ് ഇടുക്കി ഗവ. എന്ജിനിയറിങ് കോളേജിലെ വിദ്യാര്ഥികള്. അവരുടെ ഇത്തവണത്തെ ഓണാഘോഷം തെരുവിലകപ്പെട്ട പാവങ്ങളുടെ കൂടെയാണ്, അവര്ക്കുവേണ്ടി ഒരുപൊതിച്ചോറ് മാറ്റിവച്ചുകൊണ്ടാണ്.
കേരളത്തിലെ എല്ലാ ജില്ലകളിലെയും അനാഥാലയങ്ങളിലും തെരുവുകളിലും കഴിയുന്നവര്ക്ക് ഈ വിദ്യാര്ഥികള് ഓണസദ്യ ഒരുക്കുന്നു.
കോളേജിലെ ടെക്നിക്കല് ഫെസ്റ്റായ അദ്വയ 5.0 യുടെ ഭാഗമായാണ് തെരുവോരങ്ങളിലും അനാഥാലയങ്ങളിലും അഗതിമന്ദിരങ്ങളിലും ഓണസദ്യയൊരുക്കുന്ന 'പൊതിച്ചോറ്' എന്ന പരിപാടി സംഘടിപ്പിക്കുന്നത്.
കാസര്കോട്ടെ തുമ്മിനാട് സ്നേഹാലയം ചാരിറ്റബിള് ട്രസ്റ്റിലാണ് ഈ മാസം 25ന് പൊതിച്ചോറ് ആരംഭിച്ചത്. തുടര്ന്ന് കോട്ടയം, കണ്ണൂര്, കോഴിക്കോട്, ഇടുക്കി, കൊല്ലം തുടങ്ങിയ ജില്ലകളില് ഓണസദ്യ ഒരുക്കി.
കൊല്ലം മുണ്ടയ്ക്കല് അഗതിമന്ദിരത്തിലാണ് ഓണസദ്യ ഒരുക്കിയത്. ആശ്രാമം, ചിന്നക്കട, ബീച്ച്, കന്പോളം, ഗവ. ഹോസ്പിറ്റല് പരിസരം എന്നിവിടങ്ങളിലെ ഭിക്ഷാടകര്ക്കും വിപുലമായ ഓണസദ്യ നല്കി.
അതത് ജില്ലയിലെ കുട്ടികളാണ് അവിടത്തെ ഓണസദ്യയ്ക്ക് നേതൃത്വം നല്കുന്നത്. കുട്ടികളില്നിന്നുതന്നെ പണം സ്വരൂപിച്ചാണ് സദ്യയൊരുക്കുന്നത്. ശനിയാഴ്ചയോടെ എല്ലാജില്ലകളിലും ഓണസദ്യ നല്കും. തിരുവനന്തപുരം നവജീവന് ബാലഭവനിലാണ് പരിപാടി അവസാനിക്കുന്നത്.
