കണ്ണീര്‍തുളുമ്പി ഭാരതം...
Posted on: 30 Nov 2008
മുംബൈ/ബാംഗ്ലൂര്‍: ഭീകരാക്രമണത്തിനിടെ കൊല്ലപ്പെട്ട മുംബൈ പോലീസിലെ ഭീകരവിരുദ്ധ സ്‌ക്വാഡ് മേധാവി ഹേമന്ത് കര്‍ക്കരെയ്ക്കും മലയാളിയായ എന്‍.എസ്.ജി. മേജര്‍ സന്ദീപിനും രാജ്യം വികാരനിര്‍ഭരമായ യാത്രാമൊഴി നല്‍കി. കര്‍ക്കരെയുടെ ശവസംസ്‌കാരം മുംബൈയിലും സന്ദീപിന്‍േറത് ബാംഗ്ലൂരിലുമാണ് ശനിയാഴ്ച നടന്നത്. വന്‍ ജനാവലിയുടെ സാന്നിധ്യത്തിലായിരുന്നു ചടങ്ങുകള്‍.കര്‍ക്കരെയുടെ മൃതദേഹം വഹിച്ചുനീങ്ങിയ വിലാപയാത്രയില്‍ ദേശസ്നേഹ മുദ്രാവാക്യങ്ങളുമായി ആയിരങ്ങളാണ് അണിനിരന്നത്. ശിവജിപാര്‍ക്കിലെ വീട്ടില്‍ നിന്ന് ദാദര്‍ വൈദ്യുതി ശ്മശാനത്തിലേക്കുള്ള വഴിയുടെ ഇരുവശത്തും വികാരവിവശരായ ജനങ്ങള്‍ ഇരമ്പിക്കൂടി.
മഹാരാഷ്ട്ര മുഖ്യമന്ത്രി വിലാസ്‌റാവു ദേശ്മുഖടക്കം ഒട്ടേറെ നേതാക്കളും പ്രമുഖരും ശവസംസ്‌കാരച്ചടങ്ങില്‍ പങ്കെടുത്തു.
ബാംഗ്ലൂരില്‍ മേജര്‍ സന്ദീപിന്റെ ഭൗതിക ശരീരത്തില്‍ അഞ്ജലിയര്‍പ്പിക്കാന്‍ ജനങ്ങളുടെ അണമുറിയാത്ത പ്രവാഹമായിരുന്നു. പിന്നീടു നടന്ന വിലാപയാത്രയിലും ശവസംസ്‌കാരച്ചടങ്ങിലും അസംഖ്യമാളുകള്‍ പങ്കെടുത്തു.
