ചെന്നൈ: സഹതാപമല്ല, സംരക്ഷണവും തൊഴിലവസരവുമാണ് ഞങ്ങള്‍ക്കാവശ്യമെന്ന സന്ദേശമായിരുന്നു ആ ഉല്പന്നങ്ങളില്‍ തെളിഞ്ഞുനിന്നിരുന്നത്. മധുര പലഹാരങ്ങള്‍, കരകൗശല വസ്തുക്കള്‍, മാലകള്‍, പെയിന്റിങ്ങുകള്‍ തുടങ്ങി വൈകല്യത്തെ തോല്പിച്ച ഉല്പന്നങ്ങള്‍ ഒട്ടേറെയുണ്ടായിരുന്നു. മാനസിക വൈകല്യങ്ങളുള്ള കുട്ടികളുടെ പുനരധിവാസ കേന്ദ്രമായ പാത്ത്‌വെ സെന്ററാണ് ഇവരുടെ ഉല്പന്നങ്ങള്‍ പ്രദര്‍ശനത്തിനെത്തിച്ചത്.

ബുദ്ധിവൈകല്യമുള്ള കട്ടികള്‍ക്ക് തൊഴില്‍പരിശീലനം നല്കുന്നതിനായി പാത്ത്‌വെ ദേശീയതലത്തില്‍ നടപ്പിലാക്കുന്ന പദ്ധതിയുടെ ഉദ്ഘാടനത്തോടനുബന്ധിച്ചാണ് കുട്ടികള്‍ നിര്‍മിച്ച വസ്തുക്കള്‍ പ്രദര്‍ശിപ്പിച്ചത്. പദ്ധതി ഉദ്ഘാടനം ചെയ്യാനെത്തിയ കുടുംബക്ഷേമ വകുപ്പ് മന്ത്രി പൂങ്കോതെ കുട്ടികളെ അഭിനന്ദിച്ചു.

ബുദ്ധിവൈകല്യമുള്ളവര്‍ക്ക് വൊക്കേഷണല്‍ പരിശീലനം നല്കുന്നതിനായി പാത്ത്‌വെ പ്രത്യേക കേന്ദ്രംതന്നെ ആരംഭിച്ചിട്ടുണ്ട്. നിലവില്‍ 50 പേര്‍ കേന്ദ്രത്തില്‍ നിന്നും പരിശീലനം തേടുന്നു. ഓഫ്‌സെറ്റ് പ്രിന്റിങ്, ഗ്രീറ്റിങ് കാര്‍ഡ് നിര്‍മാണം, ബേക്കറി ഉല്പന്നങ്ങള്‍ തുടങ്ങി 13 ഇനങ്ങളിലാണ് പരിശീലനം നല്കുന്നത്.