ന്യൂഡല്‍ഹി: നികുതിദായകര്‍ക്ക് പ്രയോജനപ്രദമായ ബജറ്റ് അവതരിപ്പിച്ച ധനമന്ത്രി പ്രണബ് മുഖര്‍ജി പക്ഷേ, രാഷ്ട്രപതി പ്രതിഭാപാട്ടീലിനുള്ള ശമ്പള ആനുകൂല്യവിഹിതം പകുതിയാക്കി കുറച്ചു.2010 - 11 വര്‍ഷത്തേക്ക് രാഷ്ട്രപതിഭവനുള്ള ബജറ്റ് വിഹിതത്തില്‍ 9.93 ശതമാനം വര്‍ധനയുണ്ട്. രാഷ്ട്രപതി ഭവന്റെ ചെലവുകളും ജീവനക്കാരുടെ ശമ്പളവും രാഷ്ട്രപതി കാര്യാലയത്തിന്റെ ചെലവുകളും ഇതില്‍ ഉള്‍പ്പെടും. എന്നാല്‍ രാഷ്ട്രപതിയുടെ ശമ്പളത്തിനും ആനുകൂല്യങ്ങള്‍ക്കുമായി 0.18 കോടി രൂപയാണ് നീക്കിവെച്ചത്. മുന്‍വര്‍ഷത്തേക്കാള്‍ 50 ശതമാനം കുറവാണിത്. കഴിഞ്ഞവര്‍ഷം ഇത് 0.38 കോടി രൂപയായിരുന്നു. 29.11 കോടി രൂപയാണ് ഈ സാമ്പത്തികവര്‍ഷം രാഷ്ട്രപതിഭവന്റെ ബജറ്റ് വിഹിതം. കഴിഞ്ഞവര്‍ഷം ഇത് 27.52 കോടിയായിരുന്നു.
ഇന്ത്യന്‍ രൂപയ്ക്ക്
പുതിയ പ്രതീകം
ന്യൂഡല്‍ഹി: ഇന്ത്യയുടെ സംസ്‌കാരവും വിശ്വാസവും പ്രതിഫലിപ്പിക്കുന്ന രീതിയില്‍ രൂപയ്ക്ക് പുതിയ പ്രതീകം രൂപപ്പെടുത്തുമെന്ന് ബജറ്റ് അവതരത്തിനിടെ ധനകാര്യമന്ത്രി പ്രണബ് മുഖര്‍ജി പറഞ്ഞു.പ്രമുഖ അന്താരാഷ്ട്ര കറന്‍സികള്‍ക്കിടയില്‍ സവിശേഷത വ്യക്തമാവുന്ന തരത്തിലുള്ള പ്രതീകം കണ്ടെത്താനുള്ള ശ്രമത്തിലാണ് ധനമന്ത്രാലയം.ഇത് പ്രാബല്യത്തിലായാല്‍ യു.എസ്. ഡോളര്‍, ബ്രിട്ടീഷ് പൗണ്ട്, സ്റ്റെര്‍ലിങ്, യൂറോ, ജപ്പാനിലെ യെന്‍ എന്നിവ ഉള്‍പ്പെടുന്ന കറന്‍സി ക്ലബില്‍ ഇന്ത്യന്‍ രൂപയും ഉള്‍പ്പെടും.