തിരുവനന്തപുരം: ഗുണ്ടാ-മാഫിയ സംഘങ്ങള്‍ക്കെതിരെയുള്ള നടപടികളുടെ ഭാഗമായി സംസ്ഥാനത്തൊട്ടാകെ ബുധനാഴ്ച 735 പേര്‍ അറസ്റ്റിലായി. തിരുവനന്തപുരം റേഞ്ചില്‍ 233 പേരും കൊച്ചി റേഞ്ചില്‍ 226 പേരും തൃശ്ശൂര്‍ റേഞ്ചില്‍ 79 പേരും കണ്ണൂര്‍ റേഞ്ചില്‍ 197 പേരുമാണ് അറസ്റ്റിലായത്. ഇതോടെ ഫിബ്രവരി 24മുതല്‍ ആരംഭിച്ച ഓപ്പറേഷന്‍ സുരക്ഷയുടെ ഭാഗമായി ആകെ 10159 പേര്‍ പിടിയിലായി. സമൂഹവിരുദ്ധ പ്രവര്‍ത്തനങ്ങളില്‍ ഏര്‍പ്പെടുന്നവര്‍ക്കെതിരെയുള്ള നടപടി വരുംദിവസങ്ങളില്‍ കൂടുതല്‍ കര്‍ശനമാക്കുമെന്ന് ഓപ്പറേഷന്‍ സുരക്ഷയുടെ സംസ്ഥാനതല ഏകോപന ചുമതലയുള്ള എ.ഡി.ജി.പി. അരുണ്‍കുമാര്‍ സിന്‍ഹ അറിയിച്ചു. ഇത്തരം പ്രവര്‍ത്തനങ്ങളില്‍ ഏര്‍പ്പെടുന്നവര്‍ക്കെതിരെയുള്ള പരാതികള്‍ 1090 എന്ന നമ്പരില്‍ വിളിച്ചോ അതത് ജില്ലകളിലെ ജില്ലാ പോലീസ് മേധാവിമാരെയോ അറിയിക്കാമെന്ന് എ.ഡി.ജി.പി. അറിയിച്ചു.