അക്വാടൂറിസം ക്ലിക്ക്ഡ്‌
Posted on: 01 Sep 2008
വൈപ്പിന്‍: മത്സ്യഫെഡിന്റെ അക്വാടൂറിസം പദ്ധതി വിജയത്തിലേക്ക്. മൂന്ന് മാസം കൊണ്ട് അയ്യായിരത്തിലേറെ സഞ്ചാരികളെ ആകര്‍ഷിച്ചു കഴിഞ്ഞു. ഞാറയ്ക്കലെ ഫിഷ്ഫാമില്‍ ആരംഭിച്ച ടൂറിസം സെന്റര്‍. നൂറു രൂപയ്ക്ക് ഒരുദിവസം മുഴുവന്‍ വിശാലമായ ഫിഷ്ഫാമിലെ കുളിര്‍കാറ്റ് ആസ്വദിക്കാം. ചൂണ്ടയിട്ട് മീന്‍ പിടിക്കാം. ശാന്തമായ ഓളപ്പരപ്പിലൂടെ പെഡല്‍ ബോട്ട് സവാരിയുമാകാം. ഉച്ചയ്ക്ക് പച്ചമീന്‍ കറിയും കൂട്ടിയുള്ള ഒരു നാടന്‍ ഊണും. വിശ്രമ വേളയില്‍ ഒരു കരിക്കും. മടുക്കുമ്പോള്‍ തെങ്ങോട് തെങ്ങ് ചേര്‍ത്ത് കെട്ടിയിട്ടുള്ള ഊഞ്ഞാലില്‍ ഉച്ചയുറക്കവുമാകാം.
എറണാകുളത്ത് നിന്ന് 20മിനിറ്റ് യാത്ര ചെയ്താല്‍ ഞാറയ്ക്കലെ ടൂറിസം സെന്ററിലെത്താം.
വൈപ്പിന്‍-മുനമ്പം സംസ്ഥാന പാതയില്‍ ഞാറയ്ക്കല്‍ ആസ്പത്രിക്കവലയില്‍ നിന്ന് ഒരുകിലോമീറ്റര്‍ പടിഞ്ഞാറോട്ട് സഞ്ചരിച്ചാല്‍ കടല്‍ത്തീരത്തോട് ഏറെ ദൂരത്തല്ലാതെയാണ് ഈ വിനോദസഞ്ചാരകേന്ദ്രം. സംസ്ഥാന സര്‍ക്കാര്‍ സംരംഭമായ കേരള സ്റ്റേറ്റ് കോ-ഓപ്പറേറ്റീവ് ഫെഡറേഷന്‍ ഫോര്‍ ഫിഷറീസ് ഡെവലപ്പ്‌മെന്റ് ലിമിറ്റഡിന്റെ കീഴിലാണ് ഈ വിനോദസഞ്ചാരകേന്ദ്രം.
കുടുംബശ്രീ യൂണിറ്റുകളില്‍ നിന്നും തിരഞ്ഞെടുക്കപ്പെട്ട 9പേരടങ്ങുന്ന ആക്ടിവിറ്റി ഗ്രൂപ്പിനാണ് നിര്‍വഹണ ചുമതല.
സഞ്ചാരികളില്‍ നിന്നും കിട്ടുന്ന നൂറു രൂപയില്‍ 48രൂപ ഭക്ഷണത്തിനും മറ്റുമായി ഇവര്‍ക്കുള്ളതാണ്.
