മലയാള സിനിമയ്ക്ക് പനോരമ ആഗോള വേദിയൊരുക്കുന്നു
പി. പ്രേംചന്ദ്‌ Posted on: 27 Nov 2010
പനാജി: ഇന്ത്യന്‍ പനോരമ മലയാള സിനിമയ്ക്ക് ആഗോള വേദിയൊരുക്കുന്നതില്‍ നിര്‍ണായക പങ്കുവഹിക്കുന്ന സംവിധാനമാണെന്ന് മലയാളി സംവിധായകരും താരങ്ങളും അണിനിരന്ന ഓപ്പണ്‍ ഫോറം അഭിപ്രായപ്പെട്ടു. ഐനോക്‌സ് അങ്കണത്തില്‍ നടന്ന ഓപ്പണ്‍ ഫോറത്തില്‍ സംവിധായകരായ പ്രേംലാല്‍, എം.ആര്‍. രാജന്‍, നിര്‍മാതാവ് സന്തോഷ് പവിത്രന്‍, നടന്‍ വിനീത്, സംവൃത സുനില്‍ എന്നിവര്‍ പങ്കെടുത്തു.
സഞ്ജീവ് ശിവന്റെ ഇന്ത്യന്‍ പനോരമ നോണ്‍ ഫീച്ചര്‍ വിഭാഗത്തിലുള്ള 'ആതുഗ് ബേബി'യാണ് വെള്ളിയാഴ്ച ഇഫിയില്‍ ചര്‍ച്ച ചെയ്യപ്പെട്ട മലയാളി രചന. നാല്പതിലേറെ അന്താരാഷ്ട്ര ചലച്ചിത്രോത്സവത്തില്‍ പ്രദര്‍ശിപ്പിച്ച 'ആതുഗ് ബേബി' ലഡാക്കില്‍ ശുദ്ധ ആര്യന്മാരെന്ന് കരുതപ്പെടുന്ന ഗോത്രവര്‍ഗക്കാരെ തേടി കുട്ടികളുണ്ടാക്കാനായി ജര്‍മന്‍ സ്ത്രീകള്‍ എത്തിക്കൊണ്ടിരിക്കുന്ന അപൂര്‍വ നരവംശ ശാസ്ത്ര പ്രതിഭാസത്തിന്റെ ഉള്ളറകളിലേക്കാണ് വെളിച്ചം വീശുന്നത്.
ലഡാക്കിനെക്കുറിച്ചൊരു ഡോക്യുമെന്ററി ചെയ്യാന്‍ പുറപ്പെട്ട് ഇത്തരമൊരു വിഷയത്തില്‍ എത്തിച്ചേര്‍ന്നതാണെന്ന് സംവിധായകന്‍ സഞ്ജീവ് ശിവന്‍ പറഞ്ഞു. സഞ്ജീവിനെ നേരത്തേ സിനിമയുടെ പ്രദര്‍ശനവേളയില്‍ ആദരിച്ചു. ബാബു കാമ്പ്രത്തിന്റെ കൈപ്പാട് എന്ന ഡോക്യുമെന്ററി മേളയില്‍ പ്രദര്‍ശിപ്പിച്ചു.
