ആനിന്റെ മനസ്സിന് പവന്‍ മാറ്റ്‌
Posted on: 29 Jul 2015
തൊടുപുഴ: പൊന്നിനേക്കാള്‍ തിളക്കമുണ്ട്്്്്്് നാലാംക്ലാസ്സുകാരി ആന്‍ മരിയ ബൈജുവിന്റെ മനസ്സിന്. യാത്രയ്ക്കിടയില്‍ ബസ്സില്‍നിന്നു കിട്ടിയ അരപവന്‍ തൂക്കമുള്ള മാലയാണ് ആന്‍ ഉടമസ്ഥര്‍ക്ക് തിരികെ നല്‍കിയത്.
തൊടുപുഴ ജയ്‌റാണി സ്‌കൂള്‍ മുറ്റത്തുനടന്ന ചടങ്ങില്‍ ഉടമസ്ഥരായ കൊല്ലപ്പിള്ളി കാരിശേരില്‍ അനീഷും ഭാര്യ ശ്രീജയും ചേര്‍ന്ന് ഏറ്റുവാങ്ങി. ഇവരുടെ രണ്ടുവയസ്സുള്ള മകന്‍ അദ്വൈതിന്റേതാണ് മാല. ഞായറാഴ്ച കോട്ടയത്തുനിന്ന് പാലായ്ക്കു വരുന്നതിനിടയിലാണ് കുട്ടിയുടെ കഴുത്തില്‍നിന്ന് മാല ബസ്സില്‍ വീണത്. മാല മാറ്റി പുതിയത് എടുക്കാന്‍വേണ്ടി കടയില്‍ ചെന്നപ്പോഴാണ് നഷ്ടപ്പെട്ടവിവരം അറിഞ്ഞത്.
ഇതേ ബസ്സില്‍ കരിങ്കുന്നത്തുനിന്ന് കയറിയ ആന്‍ മരിയയ്ക്ക് മാല കിട്ടി. ഇത് ആന്‍ സ്‌കൂളില്‍ ഏല്‍പ്പിച്ചു. സ്‌കൂള്‍ അധികൃതര്‍ പോലീസിന് നല്‍കി. പത്രങ്ങളില്‍ വാര്‍ത്ത കണ്ട്്് ചൊവ്വാഴ്ച അനീഷും കുടുംബവും തൊടുപുഴ പോലീസ് സ്റ്റേഷനിലെത്തി.
തൊടുപുഴ സി.ഐ. ജില്‍സണ്‍ മാത്യുവിന്റെ നേതൃത്വത്തിലുള്ള പോലീസിന്റെ സാന്നിദ്ധ്യത്തില്‍ ആന്‍ സ്‌കൂളില്‍വച്ച് മാല കൈമാറി. ശ്രീജ ആനിനെ ചേര്‍ത്തുനിര്‍ത്തി കവിളില്‍ തലോടി സന്തോഷം പങ്കുവച്ചു. വിദ്യാര്‍ഥികളും അധ്യാപകരും ആനിനെ അഭിനന്ദിക്കാന്‍ ചുറ്റുംകൂടി.
