ആനക്കര: ആനക്കര പഞ്ചായത്തിലെ കര്‍ഷകര്‍ക്ക് ആയിരം തെങ്ങിന്‍തൈകള്‍ സൗജന്യമായി നല്‍കി കുമ്പിടി കടവ്‌റോഡിലെ ആലിക്കുട്ടിഹാജി മാതൃകയായി. വീട്ടുവളപ്പിലെ ഏറ്റവും കൂടുതല്‍ കായ്ഫലം നല്‍കുന്ന തെങ്ങുകളില്‍നിന്ന് വിത്തുതേങ്ങ ശേഖരിച്ച് പാരമ്പര്യരീതികളും കൃഷി ഉദ്യോഗസ്ഥരുടെ നിര്‍ദേശങ്ങളും അനുസരിച്ച് നട്ടുവളര്‍ത്തിയ തെങ്ങിന്‍ തൈകളാണ് പഞ്ചായത്തില്‍ കൃഷിയിലേര്‍പ്പെടുന്നവര്‍ക്കായി ആലിക്കുട്ടിഹാജി വിതരണംചെയ്തത്.

ആലിക്കുട്ടിഹാജിയുടെ സ്വന്തം തെങ്ങിന്‍തോപ്പില്‍ ജൈവവള കൃഷിയാണ് നടത്തുന്നത്. ഗുണമേന്‍മയുള്ള നാളികേരങ്ങളാണ് ഈ തെങ്ങുകളിലേത്. കുലയില്‍ ധാരാളം എണ്ണമുണ്ടാകുന്നതും തന്റെ കൃഷിനേട്ടമായി ഹാജി വിലയിരുത്തുന്നു. ഇവയുടെ തൈകള്‍ നല്ല കായ്ഫലം നല്‍കുന്ന തെങ്ങുകളായി മാറുമെന്ന് ഹാജി പ്രതീക്ഷിക്കുന്നു. പഞ്ചായത്തില്‍ വിവിധരോഗങ്ങള്‍ ബാധിച്ചും കായ്ഫലം കുറഞ്ഞും തെങ്ങുകള്‍ നശിക്കുകയും വെട്ടിമാറ്റപ്പെടുകയും ചെയ്യുമ്പോഴാണ് ഇതിനെ പ്രതിരോധിക്കാന്‍ ഹാജി മുന്നോട്ടുവന്ന് മാതൃകയായത്.