Home>Diseases And Symptoms
FONT SIZE:AA

കീബോര്‍ഡ് ഉപയോഗിക്കുമ്പോള്‍ കടച്ചില്‍

മണിബന്ധ സന്ധിയിലൂടെ കൈപ്പത്തിയിലേക്ക് കടന്നുപോവുന്ന നാഡിക്ക് തിങ്ങലോ ഞെരുങ്ങലോ അനുഭവപ്പെടുമ്പോള്‍ തള്ളവിരല്‍, ചൂണ്ടുവിരല്‍, നടുവിരല്‍ എന്നിവയ്ക്കും പ്രത്യേകിച്ചും കൈപ്പത്തിക്ക് മൊത്തമായും തരിപ്പും കടച്ചിലും അനുഭവപ്പെടാറുണ്ട്. ഇതേത്തുടര്‍ന്ന് മണിബന്ധസന്ധി ചലിപ്പിക്കാനും മറ്റും പ്രയാസമാകുന്നു. കൈകളെ ബാധിക്കുന്ന ഒരു പ്രധാന വാതരോഗമാണിത്.

ഹോര്‍മോണുകളുടെ പ്രവര്‍ത്തനത്തില്‍ വരുന്ന വ്യതിയാനങ്ങളോ രക്തത്തെ ബാധിക്കുന്ന ചില രോഗാവസ്ഥകളോ നിമിത്തം ശരീരത്തില്‍ നീര്‍ക്കെട്ട് വരുന്ന അവസ്ഥകളില്‍ ഈ അസുഖം ഉണ്ടാകുവാന്‍ സാധ്യതയുണ്ട്. അതുകൊണ്ടുതന്നെ മധ്യവയസ്സു കഴിഞ്ഞ സ്ത്രീകളിലാണ് ഈ അസുഖം കൂടുതലായി കാണുന്നത്. ഗര്‍ഭിണികള്‍ക്കും ഈ രോഗാവസ്ഥ ഉണ്ടാകാന്‍ സാധ്യതയുണ്ട്.

പാരമ്പര്യമായി ചില കുടുംബങ്ങളില്‍ കണ്ടുവരുന്ന ഈ അസുഖം രക്തവാതം, ഗൗട്ട്, തൈറോയ്ഡ് ഗ്രന്ഥിയുടെ പ്രവര്‍ത്തനക്കുറവ്, പ്രമേഹം എന്നീ രോഗങ്ങള്‍ക്ക് അനുബന്ധമായും കണ്ടുവരുന്നു. മണിബന്ധസന്ധിയിലുണ്ടാകുന്ന ചില അസ്ഥിഭംഗങ്ങള്‍ ശരിയായ രീതിയില്‍ രോപണം ചെയ്യപ്പെടാതാവുമ്പോള്‍ ഈ തുരങ്കത്തിന്റെ ഘടനയില്‍ വരുന്ന വ്യതിയാനങ്ങളും അസുഖമായി മാറാന്‍ കാരണമായേക്കാം. ഇവയ്‌ക്കെല്ലാം പുറമേ തൊഴിലുമായി ബന്ധപ്പെട്ടുണ്ടാവുന്ന ഒരു പ്രധാന വാതവ്യാധിയാണിത്. ബീഡിതെറുപ്പുകാര്‍, വീട്ടുജോലിക്കാര്‍, ക്ലര്‍ക്കുമാര്‍, കമ്പ്യൂട്ടര്‍ ഓപ്പറേറ്റര്‍മാര്‍ എന്നിങ്ങനെ കൈകള്‍ കൂടുതലായി ഉപയോഗിക്കുന്ന വലിയൊരു വിഭാഗം തൊഴിലാളികളില്‍ ഈ അസുഖം കൂടുതലായി കണ്ടുവരുന്നു.

രാത്രിയില്‍ പലപ്പോഴും ഈ രോഗം അധികരിക്കുന്നു. ഉറങ്ങാന്‍ പറ്റാത്തവിധത്തില്‍ വേദന ശല്യം ചെയ്യുന്നതായി കാണുന്നു. പച്ചക്കറികള്‍ അരിയുക, കൈകൊണ്ട് എന്തെങ്കിലും പിടിക്കുക, ബസ്സിലെ കമ്പിയില്‍ പിടിച്ച് യാത്ര ചെയ്യുക എന്നിവയൊന്നും സാധിക്കാതെ വരുന്നു.

കാരണമാവുന്ന മറ്റു വ്യാധികള്‍ കൃത്യമായ ചികിത്സകളിലൂടെ നിയന്ത്രണവിധേയമാകുമ്പോള്‍ ഈ അസുഖവും ഭേദമാവുന്നു. തൊഴിലുമായി ബന്ധപ്പെട്ടുണ്ടാകുന്നതാണെങ്കില്‍ ഒരുപരിധിവരെ വ്യായാമത്തിലൂടെയും വിശ്രമത്തിലൂടെയും പ്രതിരോധിക്കാവുന്നതാണ്.

അധികരിച്ച അവസ്ഥയിലെത്തുമ്പോള്‍ ശസ്ത്രക്രിയ ആവശ്യമായിവരുന്ന ഈ അസുഖം ആദ്യാവസ്ഥയില്‍ത്തന്നെ ചികിത്സിക്കേണ്ടതാണ്. കൃത്യമായ കാരണമറിഞ്ഞും പ്രതിരോധമാര്‍ഗങ്ങള്‍ കൈക്കൊണ്ടും സുഖപ്പെടുത്താവുന്ന ഈ അസുഖത്തിന് ആയുര്‍വേദ ചികിത്സ വളരെ ഫലപ്രദമാണ്.

ഡോ. കെ. ശോഭ

മെഡിക്കല്‍ ഓഫീസര്‍, ഗവ. ആയുര്‍വേദ ഡിസ്‌പെന്‍സറി,
കടമ്പഴിപ്പുറം
Tags- Pain in palm
Loading