a Mathrubhumi initiative
അച്ചാറിനും പഴത്തിനും മധുര അമ്പഴം
Posted on: 28 Jul 2011
എം.പി. അയ്യപ്പദാസ്
നാടന് നെല്ലി, കാരംബോള, പുളിഞ്ചി തുടങ്ങിയ നാടന് പഴങ്ങളുടെ കൂട്ടത്തില് ഒന്നാണ് മധുര അമ്പഴം. മൂക്കുന്നതിനു മുമ്പ് അച്ചാറായും പഴുത്താല് പഴമായും പ്രയോജനപ്പെടുത്താം.വൈല്ഡ് മാംഗോ, ഹോങ്പ്ലം, എംമ്രാ എന്നീ പേരുകളില് അറിയപ്പെടുന്ന ഇതിന്റെ ശാസ്ത്രനാമം സ്പോണ്ഡിയാസ് പിന്നേറ്റ എന്നാണ്. ജന്മദേശം മലേഷ്യയാണ്. സമുദ്രനിരപ്പില്നിന്ന് 1500 മീറ്റര് ഉയരം വരെയുള്ള സ്ഥലങ്ങളിലും ശ്രീലങ്ക, മ്യാന്മര്, തായ്ലന്ഡ്, മലേഷ്യ, ചൈന തുടങ്ങിയ രാജ്യങ്ങിലും വ്യാപകമായി കണ്ടുവരുന്നു.
പ്രായമേറുമ്പോള് 25 മീറ്ററോളം ഉയരത്തില് വളരുന്ന ഇതിന്റെ ശാഖകളില് ഇരുവശത്തുമായി 40 സെ. മീറ്ററോളം സമ്മുഖമായി ഇലകള് വിന്യസിച്ചിരിക്കുന്നതിനാല് മരത്തിന് നല്ല ഭംഗിയുമുണ്ട്. കായ്കള്ക്ക് ഇളംപച്ച നിറവും പഴുത്താല് മഞ്ഞനിറവുമായിരിക്കും. പോഷകസമ്പന്നമായ ഈ പഴത്തില് വൈറ്റമിന് എയും ഇരുമ്പും ധാരാളമടങ്ങിയിട്ടുണ്ട്. 30 വര്ഷത്തോളം നിലനില്പുള്ള ഇതിന്റെ ഇലകള്ക്കും പൂവിനും നറുമണമുള്ളതിനാല് കറികളില് ചേര്ത്ത് സ്വാദ് വര്ധിപ്പിക്കാം. വിളഞ്ഞ തടി പാക്കിങ് പെട്ടിയുണ്ടാക്കുവാനും തൊലി ഛര്ദി തടയുവാനുള്ള ഔഷധമായും പ്രയോജനപ്പെടുത്തുന്നുണ്ട്.വിത്തിന്റെ പുറംതോടിന് കട്ടിയുള്ളതിനാല് മുളച്ചുവരുവാന് ഒരുമാസക്കാലം വേണം. പാകി ക്കിളിര്പ്പിച്ച തൈകള് ഫലം തരുവാന് അഞ്ചുവര്ഷക്കാലം വണ്ടിവരും. എന്നാല് ഒട്ടുതൈകള് രണ്ടാംവര്ഷം മുതല് കായ്ച്ചുതുടങ്ങും. നാടന് അമ്പഴത്തിന്റെ വിത്തിട്ട് മുളപ്പിച്ച തൈകളില് അത്യുത്പാദനശേഷിയുള്ള ഇനങ്ങളുടെ കൊമ്പുകള് 'എപ്പിക്കോട്ടൈല്' വഴി ഒട്ടിക്കല് പ്രക്രിയ നടത്തിയാണ് തൈകള് ഉണ്ടാക്കുന്നത്. പത്തില പ്രായമാകുമ്പോള് ഒട്ടുതൈകള് നടാന് പാകമാകും.
സൗകര്യമുണ്ടെങ്കില് എല്ലാകാലത്തും കൃഷി ചെയ്യാം. 75 x 75 x 75 അളവില് കുഴികളെടുത്ത് ജൈവവളവും മേല്മണ്ണുമായി യോജിപ്പിച്ച് കുഴികള് മുക്കാല്ഭാഗം നിറച്ചശേഷം കുഴിയുടെ മധ്യഭാഗത്ത് ചെറുകുഴിയെടുത്ത് ഒരുപിടി എല്ലുപൊടിയും വേപ്പിന്പിണ്ണാക്കും ചേര്ത്ത് തൈ നടാം. ഒരു മാസക്കാലം ദിവസേനയും അതുകഴിഞ്ഞ് ആഴ്ച ഇടവിട്ടും നനയ്ക്കണം. വര്ഷത്തില് മഴയ്ക്കു മുമ്പും പിമ്പും ഒരു കുട്ട ജൈവവളവും അരക്കിലോ എല്ലുപൊടിയും തടത്തില് ചേര്ത്ത് മണ്ണിളക്കിക്കൊടുക്കണം. ഒട്ടുതൈകള് രണ്ടാം വര്ഷം മുതല് പൂവിട്ടുതുടങ്ങും. സപ്തംബര് മാസത്തില് പൂക്കുകയും മാര്ച്ച് മാസത്തില് കായ്കള് പാകമാകുകയും ചെയ്യും. ശിഖരങ്ങളിലും ഇലത്തുഞ്ചത്തും നിറയെ പൂവുകള് ഉണ്ടാകും. ക്രീം നിറമാണ്. അഞ്ചുവര്ഷം വളര്ന്ന ഒരു ചെടിയില്നിന്നു ശരാശരി 300-400 കായ്കള് വരെ ലഭിക്കുമെന്നും ഒരു കായ്ക്ക് ശരാശരി 100-150 ഗ്രാം തൂക്കമുണ്ടാവുമെന്നുംപാറശ്ശാല ചെറുവാരക്കോണം ആത്മനിലയത്തിലെ ജയകുമാര് പറഞ്ഞു. കായ്കള് പറിച്ചുകഴിഞ്ഞാല് വീണ്ടും പൂവിട്ടുകായ്ക്കുമെന്നും ഇങ്ങനെ ആണ്ടു മുഴുവന് ചെടി ഒഴിയാതെ കായ്കള് കിട്ടുമെന്നും ജയകുമാര് അഭിപ്രായപ്പെട്ടു. രോഗ-കീടങ്ങള് ചെടിയെ ബാധിക്കാറില്ലെങ്കിലും പഴുത്താല് കായ്ഈച്ചയുടെ ഉപദ്രവം ഉണ്ടാവാം. അതിന് കൊമ്പുകളില് പഴക്കെണികള് കെട്ടി നേരിടാം.
വിവരങ്ങള്ക്ക്: 9447045976.
വെറ്റിലകൃഷിക്ക് നല്ലകാലം
ഈ വര്ഷം വെറ്റിലകൃഷിക്ക് നല്ല കാലമായിരുന്നു. ഏറ്റവും കൂടുതല് വില കിട്ടിയ സീസണ്. പാകിസ്താനിലേക്കുള്ള വെറ്റിലകൃഷിയുടെ കയറ്റുമതിയും ഈ വര്ഷം വര്ധിച്ചു. ഇതോടെ വെറ്റില കര്ഷകര് ഈ രംഗത്ത് കൂടുതല് സജീവമായി.
കേരളത്തില് വെറ്റില കൃഷിക്ക് രണ്ടു സീസണാണുള്ളത്. എടവക്കൊടി, മെയ്, ജൂണ്. തുലാക്കൊടി-ആഗസ്ത്, സപ്തംബര്. കരപ്രദേശങ്ങളിലും നിലങ്ങളിലും വെറ്റിലകൃഷി ചെയ്യാം. തനി വിളയായും തെങ്ങ്, കമുക് തോട്ടങ്ങളില് ഇടവിളയായും വെറ്റിലകൃഷി ചെയ്തുവരുന്നു. വെള്ളക്കെട്ടുള്ള പ്രദേശങ്ങള് കൃഷിക്ക് പറ്റിയതല്ല. ആണ്ടില് 200 സെ.മീറ്റര് മുതല് 400 സെന്റിമീറ്റര് വരെ മഴ ലഭിക്കുന്ന പ്രദേശം കൃഷിക്ക് വളരെ അനുയോജ്യമാണ്.
അരിക്കൊടി, തുളസി, വെണ്മണി, കല്ക്കൊടി എന്നിവയാണ് പ്രധാന ഇനങ്ങള്. നിലം നന്നായി കിളച്ച് 10-15 മീറ്റര് നീളവും 75 സെന്റിമീറ്റര് ആഴവുമുള്ള ചാലുകള് ഒരു മീറ്റര് അകലത്തില് തയ്യാറാക്കണം. ഇതില് ചാരം, ജൈവവളം, പച്ചില എന്നിവ ചേര്ത്ത് ഇളക്കണം. നല്ലതുപോലെ ഇലകള് വിരിയുന്നതും 2-3 വര്ഷം പ്രായമുള്ളതുമായ കൊടിയുടെ മുകളറ്റത്തുള്ള ശിഖരങ്ങളാണ് നടാന് ഉപയോഗിക്കേണ്ടത്. നല്ല ആരോഗ്യമുള്ള വള്ളിത്തണ്ടുകള് ഒരു മീറ്റര് നീളത്തിലാണ് മുറിച്ചെടുക്കേണ്ടത്. നിലം നന്നായി നനച്ചശേഷം കൊടികള് തമ്മില് 20 സെന്റിമീറ്റര് അകലത്തില് നടണം.
കൊടികള് നട്ടശേഷം രണ്ടാഴ്ചയിലൊരിക്കല് ചാലുകളില് ചാരവും ഉണക്ക ഇലയും ചേര്ത്ത് ചാണകവെള്ളവും ഒഴിച്ചുകൊടുക്കണം. രണ്ടാഴ്ചയിലൊരിക്കല് വളപ്രയോഗം നടത്തണം. കൂടാതെ മാസത്തിലൊരിക്കല് ശീമക്കൊന്ന, മാവില തുടങ്ങിയ ഇലകള് ചവിട്ടിച്ചേര്ത്ത് കൊടുക്കണം. തടത്തില് ശരിയായ ഈര്പ്പം വെറ്റിലക്കൊടിക്ക് ആവശ്യമാണ്. അതിനാല് രാവിലെയും വൈകുന്നേരവും ജലസേചനം നടത്തണം. എന്നാല് തടത്തില് വെള്ളം കെട്ടിനില്ക്കരുത്. നട്ട് ഒരു മാസം കഴിയുമ്പോള് കൊടി പടര്ത്താന് തുടങ്ങാം. ഇതിനായി നാട്ടിയ മുളങ്കമ്പുമായി 15-20 സെന്റിമീറ്റര് അകലത്തില് പഴനാരുകൊണ്ട് ചെറുതായി ബന്ധിച്ച് പടര്ത്താവുന്നതാണ്. കൊടിയുടെ വളര്ച്ചയനുസരിച്ച് 15-20 ദിവസത്തിലൊരിക്കല് മുളങ്കമ്പുമായി ചേര്ത്ത് കെട്ടിക്കൊടുക്കണം.
മൂന്നു മുതല് ആറുമാസത്തിനുള്ളില് കൊടിക്ക് ഒന്നരമീറ്റര് ഉയരം വെക്കും. ഈ അവസരത്തിലാണ് വിളവെടുപ്പ് നടത്തേണ്ടത്. ഇല ഞെട്ടോടുകൂടി നുള്ളിയെടുക്കണം. മാസത്തില് രണ്ടു തവണയോ ആഴ്ചയില് ഒരിക്കലോ ഇല നുള്ളാവുന്നതാണ്. ഓരോ വിളവെടുപ്പിനുശേഷവും ജൈവവളം ചേര്ത്തുകൊടുക്കണം.
കൂടുതല് വിവരങ്ങള്ക്ക്: 0494 2584863.
സാലിം കാപ്പില്
ചീരയെ അറിയൂ
ഇലക്കറിയെന്നു കേള്ക്കുമ്പോള്ത്തന്നെ മലയാളിയുടെ മനസ്സില് ഓടിയെത്തുന്ന വിളയാണ് ചീര. നമ്മുടെ കാലാവസ്ഥയും മണ്ണും ചീരക്കൃഷിക്ക് തീര്ത്തും അനുയോജ്യം. ഒരുസെന്റ് സ്ഥലത്ത് ചീര കൃഷിചെയ്താല്ത്തന്നെ ഒരു കുടുംബത്തിനുവേണ്ട ഇലക്കറി സുലഭമായി ലഭിക്കും. ഇന്ന് വിപണിയില് ലഭിക്കുന്ന ചീര വിഷലിപ്തമായ കീടനാശിനികള് ധാരാളമായി ഉപയോഗിച്ച് കൃഷിചെയ്യുന്നതാണെന്ന തിരിച്ചറിവ് ചീരക്കൃഷിയിലേക്ക് ആളുകളെ ആകര്ഷിക്കുന്നു.
ഒരുസെന്റ് സ്ഥലത്ത് ചീര കൃഷിചെയ്യാന് അഞ്ചുഗ്രാം വിത്ത് മതി. ചെടിച്ചട്ടിയിലോ തവാരണകളിലോ തൈകളുണ്ടാക്കി പറിച്ചുനടുന്നതാണ് ഉത്തമം. ചീരവിത്ത് റവയുമായി ചേര്ത്തുവേണം വിതയ്ക്കാന്. ഉറുമ്പിന്റെ ശല്യം ഒഴിവാക്കാനാണിങ്ങനെ ചെയ്യുന്നത്. മൂന്നാഴ്ച പ്രായമായ ചീരത്തൈകള് പറിച്ചുനടാം. നടാനുള്ള സ്ഥലം രണ്ടോ മൂന്നോ പ്രാവശ്യം നന്നായി കിളച്ചുമറിച്ച് നിരപ്പാക്കണം. സെന്റിന് 200 കിലോഗ്രാം ചാണകവളമോ മണ്ണിരക്കമ്പോസ്റ്റോ അടിവളമായി നല്കാം. ഒപ്പം അര കിലോഗ്രാം യൂറിയയും ഒന്നേകാല് കിലോഗ്രാം എല്ലുപൊടിയും 300 ഗ്രാം പൊട്ടാഷും ചേര്ക്കണം.
ഒരടി വീതിയും അരയടി താഴ്ചയുമുള്ള ചാലുകള് ഒന്നരയടി അകലത്തിലായി എടുത്തുവേണം ചീരത്തൈകള് പറിച്ചുനടാന്. രണ്ടു ചീരത്തൈകള് തമ്മില് അരയടിയെങ്കിലും അകലം നല്കാന് പ്രത്യേകം ശ്രദ്ധിക്കണം. പറിച്ചുനട്ട് 25 ദിവസത്തിനകം ചീര മുറിച്ചെടുക്കാം. ഓരോ വിളവെടുപ്പിനുശേഷവും അല്പം ചാണകവളവും 10 ഗ്രാം യൂറിയയും ചേര്ത്ത് മണ്ണ് കൂട്ടിക്കൊടുക്കണം. അപായരഹിതവും ചെലവു കുറഞ്ഞതുമായ ജൈവ കീട-കുമിള്നാശിനികളാണ് ചീരയിലെ ശത്രുപക്ഷത്തെ അകറ്റുവാനായി തിരഞ്ഞെടുക്കേണ്ടത്.
ഗോമൂത്രവും കാന്താരിമുളകും ചേര്ത്ത് മൃദുലശരീരമുള്ള ഇലതീനിപ്പുഴുക്കളെ നശിപ്പിക്കാം. ഇതിനായി 100 മില്ലി ഗോമൂത്രം ഒരുലിറ്റര് വെള്ളത്തില് നേര്പ്പിച്ചതില് മൂന്നുഗ്രാം കാന്താരി മുളക് അരച്ചുചേര്ത്താണ് തളിക്കേണ്ടത്.
ചീരക്കൃഷിയിലെ പ്രധാന പ്രശ്നമായ ഇലപ്പുള്ളിരോഗം വരാതെ സംരക്ഷിക്കാനും ഒരു വിദ്യയുണ്ട്. 40 ഗ്രാം പാല്ക്കായം 10 ലിറ്റര് വെള്ളത്തില് ലയിപ്പിക്കുക. ഇതില് എട്ടുഗ്രാം സോഡാപ്പൊടിയും 32 ഗ്രാം മഞ്ഞള്പ്പൊടിയും ചേര്ത്തുണ്ടാക്കിയ മിശ്രിതം കലര്ത്താം. ഈ ലായനി അരിച്ചെടുത്ത് ഇലകളുടെ ഇരുവശത്തും തളിച്ചാല് ഇലപ്പുള്ളിരോഗത്തെ പടിക്കുപുറത്തു നിര്ത്താമെന്നത് കര്ഷകരുടെ സ്വന്തം അനുഭവം. പച്ചച്ചീരത്തൈകള് ഇടകലര്ത്തി നടുന്നതും ഗുണം ചെയ്യും.
വീണാറാണി ആര്.,
കൃഷി ഓഫീസര്, കിനാനൂര്-കരിന്തളം.
ആരാമസുന്ദരികള്
സീമ ദിവാകരന്, വില: 90.00
ഗുഡ് എര്ത്ത് ബുക്സ്
പ്രകൃതിയുടെ സൗമ്യസുന്ദരമുഖങ്ങളായ പൂക്കളെക്കുറിച്ചുള്ള സമഗ്ര വിവരണങ്ങളാണ് സീമ ദിവാകരന് എഴുതിയ 'ആരാമസുന്ദരികള്' എന്ന പുസ്തകം. പൂക്കളും പൂച്ചെടികളും പൂന്തോട്ടങ്ങളും നമ്മുടെ വാസസ്ഥലങ്ങളുടെ ഭാഗമായി മാറിവരുമ്പോള് പൂക്കളെക്കുറിച്ചും പൂപരിപാലനത്തെക്കുറിച്ചും അടുത്തറിയാന് പുസ്തകം സഹായിക്കും. കേരളത്തിലെ ഉഷ്ണമേഖലാ കാലാവസ്ഥയ്ക്കിണങ്ങിയ 50 പുഷ്പങ്ങളുടെ കൃഷിയും പരിചരണവും വിപണനസാധ്യതകളും കൃതിയില് പ്രതിപാദിക്കുന്നുണ്ട്. ഉദ്യാനസ്നേഹികള്ക്കും വീട്ടമ്മമാര്ക്കും വിദ്യാര്ഥികള്ക്കും പ്രയോജനപ്പെടും.
'ഓണാട്ടുകരപ്പെരുമ'
ആകാശവാണിയില്
പ്രാദേശികചരിത്രം ശബ്ദചിത്രങ്ങളായി ആവിഷ്കരിക്കുന്നതിന്റെ ഭാഗമായി ആകാശവാണി 'ഓണാട്ടുകരപ്പെരുമ' പ്രക്ഷേപണം തുടങ്ങി. തിരുവനന്തപുരം, ആലപ്പുഴ നിലയങ്ങളില് എല്ലാ ശനിയാഴ്ചയും രാവിലെ 8.30ന് റേഡിയോ ഗ്രാമരംഗത്തിന്റെ ഭാഗമായിട്ടാണ് ഈ പരിപാടി പ്രക്ഷേപണം ചെയ്യുന്നത്.
കൊല്ലം-ആലപ്പുഴ ജില്ലകളിലായി വ്യാപിച്ചുകിടക്കുന്ന സവിശേഷതകളേറെയുള്ള ഓണാട്ടുകര പ്രദേശത്തിന്റെ കാര്ഷിക, സാമൂഹിക, സംസ്കാരിക രംഗങ്ങളിലെ പഴമയും പുതുമയും ആവിഷ്കരിക്കുന്ന ഈ പരമ്പയില് പ്രദേശത്തെ ആചാരങ്ങള്, അനുഷ്ഠാനങ്ങള്, ഉത്സവങ്ങള്, കലാസാഹിത്യ പാരമ്പര്യം, കാവുകള്, കുളങ്ങള്, ഭാഷ, സംസ്കാരം എന്നിങ്ങനെ എല്ലാ വി1ഷയങ്ങളും അപഗ്രഥിക്കുന്നു. മുരളീധരന് തഴക്കരയാണ് പരമ്പര സംവിധാനം ചെയ്തിരിക്കുന്നത്.
Stories in this Section