ന്യൂഡല്‍ഹി: ചലച്ചിത്രമേള തുടങ്ങിയ സ്ഥിതിക്ക് ഇന്ത്യന്‍ പനോരമാ ചിത്രങ്ങളുടെ തിരഞ്ഞെടുപ്പില്‍ ഇനി ഇടപെടാനാവില്ലെന്ന് ഡല്‍ഹി ഹൈക്കോടതി. 'പഴശ്ശിരാജ'യെ പനോരമയില്‍ ഉള്‍പ്പെടുത്താത്തതിനെതിരെ സമര്‍പ്പിച്ച ഹര്‍ജിയിലാണ് കോടതിയുടെ ഉത്തരവ്. എന്നാല്‍ പനോരമാ ചിത്രങ്ങള്‍ തിരഞ്ഞെടുത്തതില്‍ ക്രമക്കേട് നടന്നിട്ടുണ്ടെന്ന് നിരീക്ഷിച്ച് കേന്ദ്രത്തിന് കോടതി നോട്ടീസ് അയച്ചു. കേസ് ഡിസംബര്‍ 13 ന് വീണ്ടും പരിഗണിക്കും.

പനോരമാ ചിത്രങ്ങളുടെ പ്രദര്‍ശനം സ്റ്റേ ചെയ്യണമെന്നും 'പഴശ്ശിരാജ'യെ ഉള്‍പ്പെടുത്തണമെന്നും പഴശ്ശിരാജ ഫൗണ്ടേഷനും പഴശ്ശിരാജ ട്രസ്റ്റും ആവശ്യപ്പെട്ടെങ്കിലും കോടതി അനുവദിച്ചില്ല. ജസ്റ്റിസ് ഗീതാ മിത്തലിന്റെ ബെഞ്ചാണ് ഹര്‍ജി പരിഗണിച്ചത്. ഉത്തരവിനെതിരെ സുപ്രീംകോടതിയെ സമീപിക്കാന്‍ ആലോചിക്കുകയാണ് ഹര്‍ജിക്കാര്‍.