ആത്മകഥാപരമായ സിനിമയുമായി കൊറിയന്‍ സംവിധായിക
Posted on: 26 Nov 2009
അനാഥാലയത്തിന്റെ പശ്ചാത്തലത്തില്‍ കൊച്ചുകുട്ടികളുടെ കഥകള്‍ ലോകസിനിമ ഏറെ പറഞ്ഞിട്ടുണ്ട്. പറഞ്ഞു പഴകിയ ഈ പ്രമേയത്തില്‍ ആത്കഥപരമായ വേദനകള്‍ ഉള്‍ചേര്‍ത്തുകൊണ്ട് ഹൃദയത്തില്‍ തെടുന്ന, ലളിതമായൊരു സിനിമയൊരുക്കിയിരിക്കുകയാണ് 'ഔനി ലക്കോംതെ 'ബ്രാന്‍ഡ് ന്യൂലൈഫി'ല്‍. കൊറിയയില്‍ നിന്നും ഒമ്പതാം വയസില്‍ ഫ്രാന്‍സിലെ ഒരു ഭവനത്തിലേക്ക് ദത്തെടുക്കപ്പെട്ട ലക്കോംതെ സ്വലനുഭവത്തിന്റെ തീവ്രതയെ ശക്തമായി ചിത്രീകരിക്കുന്നുണ്ട് ഗോവന്‍ ചലച്ചിത്രോത്സവത്തിലെ മത്സരവിഭാഗത്തില്‍ പ്രദര്‍ശിപ്പിക്കുന്ന ബ്രാന്‍ഡ് ന്യൂ ലൈഫില്‍.1975 ലെ ഒരു വേനലാരംഭത്തില്‍ ജിനി എന്ന ഒമ്പതുവയസുകാരിയെ അവളുടെ പിതാവ് ഒരു ക്രിസ്ത്യന്‍ അനാഥാിയത്തില്‍ ഉപേക്ഷിക്കുകയാണ്. പിതാവു മടങ്ങിവരുമെന്ന പ്രതീക്ഷയില്‍ അനാഥാലയത്തിന്‍െ ചുറ്റുപാടുളോട് ഇണങ്ങിചേരാന്‍ മടിക്കുന്ന ജിനി പിന്നീട് അവിടെയുള്ളവരെ പതുക്കെ തിരിച്ചറിയുകയാണ്. ആര്‍ത്തവരക്തം പുരണ്ട തുണികള്‍ രഹസ്യമായി കഴുകി വൃത്തിയാക്കികൊണ്ട് പ്രായപൂര്‍ത്തിയായെന്ന വിവരം മറ്റുള്ളവരില്‍ നിന്നും മറച്ചുവെക്കുന്ന പന്ത്രണ്ടുകാരി, വളരെ പ്രായോഗികമായ മാര്‍ഗങ്ങളിലൂടെ കുട്ടികളുടെ പ്രതിഷേധത്തെ അടക്കി നിറുത്തുന്ന അനാഥാലയത്തിലെ വേലക്കാരി വിദേശത്തു നിന്ന് ദത്തെടുക്കാനായി എത്തുന്ന ദമ്പതിമാരെ കാത്തിരിക്കുന്ന കുട്ടികള്‍, ദത്തെടുക്കല്‍ പ്രായം കഴിഞ്ഞതിനാല്‍ വീട്ടുവേലക്കാരിയായി പോകേണ്ടി വരുന്നതില്‍ ഇഷ്ടപ്പെടാതെ ആത്മഹത്യക്കു ശ്രമിക്കുന്ന അംഗവൈകല്യം വന്ന പെണ്‍കുട്ടി തുടങ്ങിയ കഥാപാത്രങ്ങളെല്ലാം ഈ സിനിമയില്‍ നിന്ന് പ്രേക്ഷകമനസ്സിലേക്ക് ഇറങ്ങിവരുന്നു.
പശ്ചാത്തല സംഗീതം ബോധപൂര്‍വ്വം ഒഴിവാക്കികൊണ്ട് ശസ്ത്രക്രിയാ കൃത്യത പൂലര്‍ത്തുന്ന ദൃശ്യങ്ങളിലൂടെ ബ്രാന്‍ഡ് ന്യൂ ലൈഫ് അനാഥത്വത്തിന്റെ വേദന പ്രേക്ഷകരിലെത്തിക്കുന്നു. ഈ സവിശേഷ ജീവിത സാഹചര്യങ്ങള്‍ക്ക് പ്രത്യയശാസ്തസാധുത നല്‍കുന്ന മതാന്തരീക്ഷത്തെ വിമര്‍ശന വിധേയമാക്കുന്നതിലും ഈ സിനിമ ഒരു പരുധി വരെ വിജയിക്കുന്നുണ്ട്.
ഡോണ്‍ ജോര്‍ജ്‌
