a Mathrubhumi initiative
പുതിയ ഐഫോണിന് 800 ഡോളര്: ആരാധകര്ക്ക് നടുക്കമുളവാക്കി അഭ്യൂഹം
Posted on: 02 Aug 2012
-സ്വന്തം ലേഖകന്
ആപ്പിള് പുറത്തിറക്കാന് പോകുന്ന പുതിയ ഐഫോണിന് 800 ഡോളര് (ഏതാണ്ട് 45000 രൂപ) ആയിരിക്കുമോ വില? ഐഫോണ് 5 എന്ന് വിശേഷിപ്പിക്കപ്പെടുന്ന പുതിയ സ്മാര്ട്ട്ഫോണ് ആപ്പിള് വില്ക്കുക ഇത്രയും ഉയര്ന്ന വിലയ്ക്കായിരിക്കുമെന്ന അഭ്യൂഹം ഇന്റര്നെറ്റിലാകെ പടരുകയാണ്.
വ്യാഴാഴ്ച്ച രാവിലെ മുതല് ട്വിറ്ററിലാണ് ഐഫോണ് 5 ന് 800 ഡോളര് വിലയെന്ന അഭ്യൂഹം പ്രത്യക്ഷപ്പെട്ടു തുടങ്ങിയതെന്ന്, 'ഇന്റര്നാഷണല് ബിസിനസ് ടൈംസ്' റിപ്പോര്ട്ടു ചെയ്തു. ആപ്പിള് ആരാധകര്ക്ക് നടുക്കമുളവാക്കിക്കൊണ്ടാണ് ഈ അഭ്യൂഹം പടര്ന്നത്.
'iPhone 5 $800' എന്നത് വ്യാഴാഴ്ച ലോകമെങ്ങും ട്വിറ്ററിലെ ഏറ്റവും ജനപ്രിയ പ്രയോഗങ്ങളില് രണ്ടാംസ്ഥാനത്തെത്തിയെന്ന് റിപ്പോര്ട്ട് പറയുന്നു.
|
|
ഐഫോണ് 5 ന്റെ വിലയെക്കുറിച്ച് ട്വിറ്ററില് പ്രത്യക്ഷപ്പെട്ട ചില അപ്ഡേറ്റുകള് |
അമേരിക്കയില് സെല്ലുലാര് സേവനദാതാക്കളുടെ കരാറോടുകൂടി ഐഫോണ് 4എസിന്റെ 64 ജിബി മോഡല് വാങ്ങുമ്പോള് 399 ഡോളര് (ഏതാണ്ട് 21000 രൂപ) ആണ് വില.
ഇപ്പോഴത്തെ അഭ്യൂഹത്തിന്റെ ഉറവിടം വ്യക്തമല്ല. പുതിയ ഐഫോണുമായി ബന്ധപ്പെട്ട് പുറത്തുവരുന്ന അഭ്യൂഹങ്ങളില് ഏറ്റവും ഒടുവിലത്തേതാണിത്. സപ്തംബര് 12 ന് ഐഫോണ് 5 ആപ്പിള് അവതരിപ്പിക്കുമെന്ന് കഴിഞ്ഞയാഴ്ച പ്രമുഖ സൈറ്റുകള് റിപ്പോര്ട്ട് ചെയ്തിരുന്നു.
പുതിയ ഐഫോണിന് വലിയ സ്ക്രീന് ആയിരിക്കുമെന്ന് കുറെ നാളായി റിപ്പോര്ട്ടുകള് വരുന്നുണ്ട്. നാലിഞ്ചോ അതില് കൂടുതലോ ആയിരിക്കും ഐഫോണ് 5 ന്റെ സ്ക്രീന് വലിപ്പമെന്നാണ് റിപ്പോര്ട്ടുകള്.
എന്നാല്, പുതിയ ഐഫോണിനെക്കുറിച്ച് ഒരു വിവരവും പുറത്തു വിടാന് ആപ്പിള് തയ്യാറായിട്ടില്ല.
Stories in this Section