അല്‍പ്പം മെലിയൂ; ഭൂമിക്കായി
Posted on: 22 Apr 2009
ഇന്ന് ഭൗമദിനം
പൊണ്ണത്തടിയും അമിതഭാരവും കുറയ്ക്കുന്നത് നിങ്ങളുടെ മാത്രമല്ല, ഭൂമിയുടെ ആരോഗ്യത്തിനും നന്നെന്ന് റിപ്പോര്‍ട്ട്. ശരീരം അല്‍പ്പം മെലിഞ്ഞിരിക്കുന്നത് പരിസ്ഥിതിക്ക് ഗുണകരമാണത്രേ. ആഗോളതാപനം കുറയ്ക്കാന്‍ അത് സഹായിക്കുമെന്ന് 'ഇന്റര്‍നാഷണല്‍ ജേര്‍ണല്‍ ഓഫ് എപ്പിഡിമിയോളജി' പ്രസിദ്ധീകരിച്ച പഠനം പറയുന്നു. ലോകം 'ഭൗമദിനം' ആചരിക്കുന്ന വേളയിലാണ് പുതിയ പഠനറിപ്പോര്‍ട്ട് പുറത്തുവന്നിരിക്കുന്നത്.
ആഗോളതാപനത്തിന് കാരണം കാര്‍ബണ്‍ഡയോക്‌സയിഡ് അടക്കമുള്ള ഹരിതഗൃഹവാതകങ്ങള്‍ അമിതമായി അന്തരീക്ഷത്തില്‍ വ്യാപിക്കുന്നതാണ്. ഊര്‍ജോത്പാദനം, വാഹനഗതാഗതം, ഭക്ഷ്യോത്പാദനം തുടങ്ങിയവയാണ് വാതകവ്യാപനത്തിന് മുഖ്യകാരണമാകുന്നത്. വിയറ്റ്‌നാമിലെപ്പോലെ ജനസംഖ്യയില്‍ ഭൂരിപക്ഷം പേരും മെലിഞ്ഞ ശരീരപ്രകൃതിയുള്ളവരാണെങ്കില്‍, അമിത ശരീരഭാരമുള്ളവരെ അപേക്ഷിച്ച് 20 ശതമാനം ഭക്ഷ്യവസ്തുക്കളേ അവര്‍ക്ക് വേണ്ടിവരൂ. സ്വാഭാവികമായും ഭക്ഷ്യോത്പാദനം കുറയും, അന്തരീക്ഷത്തില്‍ ഹരിതഗൃഹവാതക വ്യാപനം കുറയും-റിപ്പോര്‍ട്ട് പറയുന്നു.
അതേസമയം അമേരിക്ക പോലുള്ള രാജ്യങ്ങളില്‍ ജനസംഖ്യയിലെ 40 ശതമാനവും അമിത ശരീരഭാരമോ പൊണ്ണത്തടിയോ ഉള്ളവരാണ്. അത്തരമൊരു ജനത, അമിത ഉപഭോഗം വഴി പരിസ്ഥിതിക്ക് ഏല്‍പ്പിക്കുന്ന സമ്മര്‍ദം വലുതാണെന്ന് പഠനം ചൂണ്ടിക്കാട്ടുന്നു. 'ലണ്ടന്‍ സ്‌കൂള്‍ ഓഫ് ഹൈജീന്‍ ആന്‍ഡ് ട്രോപ്പിക്കല്‍ മെഡിസിനി'ലെ ഫില്‍ എഡ്വേര്‍ഡ്‌സ്, ഇയാന്‍ റോബര്‍ട്ട്‌സ് എന്നിവരാണ് പഠനം നടത്തിയത്. വാഹനഗതാഗതം വഴിയുള്ള ഊര്‍ജോപയോഗവും മെലിഞ്ഞവരുടെ കാര്യത്തില്‍ കുറവായിരിക്കും.
നൂറുകോടി ആളുകളെ പരിഗണിക്കുക. അമിത ശരീരഭാരമുള്ള അത്രയും പേരുടെ ജീവിതശൈലിയും, അത്ര തന്നെ മെലിഞ്ഞവരുടെ കാര്യവും താരതമ്യം ചെയ്താല്‍, മെലിഞ്ഞവര്‍ മൂലം അന്തരീക്ഷത്തില്‍ എത്തുന്ന കാര്‍ബണ്‍ഡയോക്‌സയിഡ് നൂറുകോടി ടണ്‍ കുറവായിരിക്കും. ഭൂമി അത്രയും കുറച്ചേ ചൂടുപിടിക്കൂ എന്ന് സാരം. പൊണ്ണത്തടിയുള്ളവര്‍ക്ക് വരുന്ന ആരോഗ്യപ്രശ്‌നങ്ങളും ചികിത്സാച്ചെലവുകളുമൊക്കെ ചര്‍ച്ച ചെയ്യപ്പെടാറുണ്ടെങ്കിലും, പൊണ്ണത്തടിക്ക് കാരണമാകുന്ന ജീവിതശൈലി ആഗോളതാപനത്തിന് ആക്കംകൂട്ടുന്ന കാര്യം കാര്യമായി ശ്രദ്ധിക്കപ്പെടാറില്ല.
ആഹാരം അല്‍പ്പം കുറയ്ക്കുകയും ശരീരം കുറച്ച് മെലിയുകയുമാണ് എന്തുകൊണ്ടും നല്ലതെന്നാണ് ഈ പഠനം പറയുന്നത്. പക്ഷേ, ലോകമെങ്ങും കാണുന്ന പ്രവണത മറിച്ചാണെന്ന് റിപ്പോര്‍ട്ട് മുന്നറിയിപ്പ് നല്‍കുന്നു. എല്ലാ രാജ്യത്തും തടിച്ച ശരീരക്കാരുടെ സംഖ്യ കൂടുതകയാണത്രേ. ബ്രിട്ടന്റെ കാര്യം ഉദാഹരണമായെടുത്താല്‍, 1994-2004 കാലത്ത് ജനങ്ങളുടെ ശരാശരി ബോഡി മാസ് ഇന്‍ഡക്‌സ് (ബി.എം.ഐ), ആണുങ്ങളില്‍ 26-ല്‍ നിന്ന് 27.3 ആയി. സ്ത്രീകളിലില്‍ ശരാശരി ബി.എം.ഐ. 25.8 -ല്‍ നിന്ന് 26.9 ആയിയെന്ന് റിപ്പോര്‍ട്ട് ചൂണ്ടിക്കാട്ടുന്നു.
തടികൂടുകയെന്ന് പറഞ്ഞാല്‍ നടക്കാനും സ്വതന്ത്രമായി ചലിക്കാനുമുള്ള സ്വാതന്ത്ര്യം കുറയുകയെന്നാണ് അര്‍ഥം. അത്തരക്കാര്‍ക്ക് കൂടുതലായി വാഹനങ്ങളെ ആശ്രയിക്കേണ്ടി വരുന്നു. അപ്പോഴും അന്തരീക്ഷത്തില്‍ കാര്‍ബണ്‍ഡയോക്‌സയിഡിന്റെ വ്യാപനം കൂടുന്നു, ഭൂമിക്ക് ചൂടുകൂടാന്‍ കാരണമാകുന്നു. ആഗോളതാപനം ചെറുക്കാനുള്ള ശ്രമങ്ങളില്‍, ശരീരം അല്‍പ്പം മെലിയാന്‍ പാകത്തില്‍ ഭക്ഷ്യോപയോഗം കുറയ്ക്കാനും ജനങ്ങളെ പ്രേരിപ്പിക്കേണ്ടതുണ്ടെന്നാണ് ഈ പഠനം നല്‍കുന്ന സൂചന.
-ജോസഫ് ആന്റണി
josephamboori@gmail.com
പൊണ്ണത്തടിയും അമിതഭാരവും കുറയ്ക്കുന്നത് നിങ്ങളുടെ മാത്രമല്ല, ഭൂമിയുടെ ആരോഗ്യത്തിനും നന്നെന്ന് റിപ്പോര്‍ട്ട്. ശരീരം അല്‍പ്പം മെലിഞ്ഞിരിക്കുന്നത് പരിസ്ഥിതിക്ക് ഗുണകരമാണത്രേ. ആഗോളതാപനം കുറയ്ക്കാന്‍ അത് സഹായിക്കുമെന്ന് 'ഇന്റര്‍നാഷണല്‍ ജേര്‍ണല്‍ ഓഫ് എപ്പിഡിമിയോളജി' പ്രസിദ്ധീകരിച്ച പഠനം പറയുന്നു. ലോകം 'ഭൗമദിനം' ആചരിക്കുന്ന വേളയിലാണ് പുതിയ പഠനറിപ്പോര്‍ട്ട് പുറത്തുവന്നിരിക്കുന്നത്.ആഗോളതാപനത്തിന് കാരണം കാര്‍ബണ്‍ഡയോക്‌സയിഡ് അടക്കമുള്ള ഹരിതഗൃഹവാതകങ്ങള്‍ അമിതമായി അന്തരീക്ഷത്തില്‍ വ്യാപിക്കുന്നതാണ്. ഊര്‍ജോത്പാദനം, വാഹനഗതാഗതം, ഭക്ഷ്യോത്പാദനം തുടങ്ങിയവയാണ് വാതകവ്യാപനത്തിന് മുഖ്യകാരണമാകുന്നത്. വിയറ്റ്‌നാമിലെപ്പോലെ ജനസംഖ്യയില്‍ ഭൂരിപക്ഷം പേരും മെലിഞ്ഞ ശരീരപ്രകൃതിയുള്ളവരാണെങ്കില്‍, അമിത ശരീരഭാരമുള്ളവരെ അപേക്ഷിച്ച് 20 ശതമാനം ഭക്ഷ്യവസ്തുക്കളേ അവര്‍ക്ക് വേണ്ടിവരൂ. സ്വാഭാവികമായും ഭക്ഷ്യോത്പാദനം കുറയും, അന്തരീക്ഷത്തില്‍ ഹരിതഗൃഹവാതക വ്യാപനം കുറയും-റിപ്പോര്‍ട്ട് പറയുന്നു.
അതേസമയം അമേരിക്ക പോലുള്ള രാജ്യങ്ങളില്‍ ജനസംഖ്യയിലെ 40 ശതമാനവും അമിത ശരീരഭാരമോ പൊണ്ണത്തടിയോ ഉള്ളവരാണ്. അത്തരമൊരു ജനത, അമിത ഉപഭോഗം വഴി പരിസ്ഥിതിക്ക് ഏല്‍പ്പിക്കുന്ന സമ്മര്‍ദം വലുതാണെന്ന് പഠനം ചൂണ്ടിക്കാട്ടുന്നു. 'ലണ്ടന്‍ സ്‌കൂള്‍ ഓഫ് ഹൈജീന്‍ ആന്‍ഡ് ട്രോപ്പിക്കല്‍ മെഡിസിനി'ലെ ഫില്‍ എഡ്വേര്‍ഡ്‌സ്, ഇയാന്‍ റോബര്‍ട്ട്‌സ് എന്നിവരാണ് പഠനം നടത്തിയത്. വാഹനഗതാഗതം വഴിയുള്ള ഊര്‍ജോപയോഗവും മെലിഞ്ഞവരുടെ കാര്യത്തില്‍ കുറവായിരിക്കും.
നൂറുകോടി ആളുകളെ പരിഗണിക്കുക. അമിത ശരീരഭാരമുള്ള അത്രയും പേരുടെ ജീവിതശൈലിയും, അത്ര തന്നെ മെലിഞ്ഞവരുടെ കാര്യവും താരതമ്യം ചെയ്താല്‍, മെലിഞ്ഞവര്‍ മൂലം അന്തരീക്ഷത്തില്‍ എത്തുന്ന കാര്‍ബണ്‍ഡയോക്‌സയിഡ് നൂറുകോടി ടണ്‍ കുറവായിരിക്കും. ഭൂമി അത്രയും കുറച്ചേ ചൂടുപിടിക്കൂ എന്ന് സാരം. പൊണ്ണത്തടിയുള്ളവര്‍ക്ക് വരുന്ന ആരോഗ്യപ്രശ്‌നങ്ങളും ചികിത്സാച്ചെലവുകളുമൊക്കെ ചര്‍ച്ച ചെയ്യപ്പെടാറുണ്ടെങ്കിലും, പൊണ്ണത്തടിക്ക് കാരണമാകുന്ന ജീവിതശൈലി ആഗോളതാപനത്തിന് ആക്കംകൂട്ടുന്ന കാര്യം കാര്യമായി ശ്രദ്ധിക്കപ്പെടാറില്ല.
ആഹാരം അല്‍പ്പം കുറയ്ക്കുകയും ശരീരം കുറച്ച് മെലിയുകയുമാണ് എന്തുകൊണ്ടും നല്ലതെന്നാണ് ഈ പഠനം പറയുന്നത്. പക്ഷേ, ലോകമെങ്ങും കാണുന്ന പ്രവണത മറിച്ചാണെന്ന് റിപ്പോര്‍ട്ട് മുന്നറിയിപ്പ് നല്‍കുന്നു. എല്ലാ രാജ്യത്തും തടിച്ച ശരീരക്കാരുടെ സംഖ്യ കൂടുതകയാണത്രേ. ബ്രിട്ടന്റെ കാര്യം ഉദാഹരണമായെടുത്താല്‍, 1994-2004 കാലത്ത് ജനങ്ങളുടെ ശരാശരി ബോഡി മാസ് ഇന്‍ഡക്‌സ് (ബി.എം.ഐ), ആണുങ്ങളില്‍ 26-ല്‍ നിന്ന് 27.3 ആയി. സ്ത്രീകളിലില്‍ ശരാശരി ബി.എം.ഐ. 25.8 -ല്‍ നിന്ന് 26.9 ആയിയെന്ന് റിപ്പോര്‍ട്ട് ചൂണ്ടിക്കാട്ടുന്നു.
തടികൂടുകയെന്ന് പറഞ്ഞാല്‍ നടക്കാനും സ്വതന്ത്രമായി ചലിക്കാനുമുള്ള സ്വാതന്ത്ര്യം കുറയുകയെന്നാണ് അര്‍ഥം. അത്തരക്കാര്‍ക്ക് കൂടുതലായി വാഹനങ്ങളെ ആശ്രയിക്കേണ്ടി വരുന്നു. അപ്പോഴും അന്തരീക്ഷത്തില്‍ കാര്‍ബണ്‍ഡയോക്‌സയിഡിന്റെ വ്യാപനം കൂടുന്നു, ഭൂമിക്ക് ചൂടുകൂടാന്‍ കാരണമാകുന്നു. ആഗോളതാപനം ചെറുക്കാനുള്ള ശ്രമങ്ങളില്‍, ശരീരം അല്‍പ്പം മെലിയാന്‍ പാകത്തില്‍ ഭക്ഷ്യോപയോഗം കുറയ്ക്കാനും ജനങ്ങളെ പ്രേരിപ്പിക്കേണ്ടതുണ്ടെന്നാണ് ഈ പഠനം നല്‍കുന്ന സൂചന.
-ജോസഫ് ആന്റണി
josephamboori@gmail.com
